Ҡыҫҡаса театрҙың бөгөнгө тормошо хаҡында
Йәшәү тарихын 1919 йылда башлаған Мәжит Ғафури исемендәге Башҡорт дәүләт академия драма театры халыҡҡа республиканың тәүге театры, милли сәнғәтте һаҡлаусы һәм дауам итеүсе мөһим мәҙәниәт усағы булараҡ билдәле. Башҡорт академия театры үҙ сәхнәһендә бер быуатҡа яҡын ваҡыт юғары әхлаҡи ҡиммәттәрҙе раҫлап, тыныслыҡ, миһырбанлыҡ һәм мөхәббәт идеалдарына хеҙмәт итә, халыҡ мәҙәниәтен, туған телде, милли рухты һаҡлай һәм көсәйтә, халыҡты берләштерә.
Бөгөнгө көндә коллектив, милли колоритты, башҡорт сәхнә сәнғәтенең классик традицияларын һәм рус театр мәктәбе нигеҙҙәрен уңышлы һәм талантлы рәүештә бергә яраштырып ижад итә һәм, шул рәүешле, көндән — көн театр йылъяҙмаһына яңы биттәр өҫтәй. Театр репертуары башҡорт, рус һәм сит ил авторҙарының әҙәби мираҫы менән бай, улар театр репертуарында төрлө жанрҙарҙа урын алған.
Мәжит Ғафури исемендәге Башҡорт академия драма театры үҙ эшмәкәрлегендә рус театр мәктәбе нигеҙҙәренә ярашлы милли классик традицияларҙы һаҡлау, башҡорт сәхнә сәнғәтендә яңы художество-эстетик юлдар эҙләү, труппаны даими рәүештә яңы йәш көстәр менән тулыландырып тороу, театр үҙенсәлегенә ярашлы репертуар һайлау кеүек изге ынтылыштарға һәр ваҡыт тоғро.
Һуңғы йылдарҙа театр әүҙем рәүештә яңы ижад формалары ҡуллана, әҫәрҙе сәхнәгә традицион булмаған ысулдар менән ҡуйыуҙы бойомға ашыра, ҡыйыу рәүештә экспериментҡа бара, яңы ижади көстәр эҙләй һәм репертуарҙы тағы ла байытыу, төрләндереү өҫтөндә эшләй һәм был өлкәлә донъя тәжрибәһен ҡулланып, инновацион ҡараш менән традицион формалағы Рәсәй театр эшенең дөйөм динамик үҫешенә һиҙелерлек йоғонто яһай.
Мәжит Ғафури исемендәге Башҡорт дәүләт академия драма театры киләсәккә ирешелгән ҡаҙаныштарын һаҡлауҙы, шулай уҡ театрға йәмғиәттең рухи ихтыяждарына яуап биреүсе сәнғәт төрө, социаль белем усағы булараҡ та ҡарап, уның үҫешенә яңы импульс биреүҙе маҡсат итеп ҡуя. Башҡарыу сәнғәтенең һәм спектаклдәр ҡуйыу оҫталығының юғары булыуы театрға күп фестивалдәрҙә ҡатнашырға һәм уңыш ҡаҙанырға мөмкинлек бирә.
Театр 2008, 2015, 2016, 2018, 2019 йылдарҙа «Алтын Битлек» Бөтә Рәсәй милли театр фестивалендә ҡатнаша. 2016 йылда театрҙың баш рәссамы Альберт Нестеров “Костюмдар буйынса иң яҡшы рәссам эше” номинацияһында “Алтын битлек” лауреаты булды (М. Ғафуриҙың “Ҡара йөҙҙәр” повесы буйынса, реж.А. Абушахманов). 2019 йылда Айрат Абушахмановтың “Зөләйха күҙҙәрен аса” спектакле алты номинацияла “Алтын битлек”кә номинациялана һәм “Гүзәл Яхинаның “Зөләйха күҙҙәрен аса” романын сәхнәлә уҡығаны өсөн” номинацияһында лауреат була. Шулай уҡ был спектакль Бөтә Рәсәй буйлап гастролдәргә сыға. Мәскәүҙә, Грозныйҙа, Иркутскиҙа, Ҡазанда, Ижевскиҙа, Ульяновскиҙа һ.б. күп кенә халыҡ – ара театр фестивалдәрендә ҡатнаша. Театр ике тапҡыр бөтә донъя театр олимпиадаһында ҡатнаша: 2019 йылда – “Зөләйха күҙҙәрен аса” спектакле менән Санкт-Петербург ҡалаһында, ә 2023 йылда – “Джут” драмаһы менән Будапешт ҡалаһында сығыш яһай.
2018 йылда театр сәнғәтен үҫтереүгә өлөш индергән өсөн театр РФ Хөкүмәтенең Ф.Волков исемендәге премияһы менән бүләкләнә.