Театр иртәһе Родион Белецкий етәкселегендә үткән “Сценарий бүлмәһе”ндә башланды. Драматургтар заманса эш алымдарын тикшерҙе, театр тексын яңыса ҡарау юлдарын барланы. Параллель рәүештә Актерҙар йортонда Дмитрий Кошмин лабораторияһы барҙы. М.Ғафури ис. Башҡорт академия драма театрының бәләкәй залында Дарья Георгиҙың “Театрҙар өсөн Яндекс.Директ” оҫталыҡ дәресе үтте. Спикер үҙенең тәжрибәһе менән уртаҡлашты һәм ошондай осрашыуҙар театр мөхитендә ысын мәғәнәһендә ҙур үҙгәрештәргә башланғыс биреүен, заманса инструменттарға юл асыуын, театр менән тамашасыны яҡынайтыуын билдәләне. Көндөҙгө программа М. Кәрим ис. Милли йәштәр театры сәхнәһендә “Спасите Лёньку!” (М.Икрамова, реж. М. Күлбаев) спектаклен күрһәтеү менән дауам итте. Дуҫлыҡ, тормошта дөрөҫ юл һайлау тураһында ихлас һәм ябай сығыш үҫмерҙәрҙең дә, ололарҙың да күңеленә үтеп инде. Кискеһен Башдрамтеатрҙа Арыҫлан Мөбәрәков исемендәге Сибай дәүләт башҡорт драма театры “Ҡанатлы генерал” (Х. Ирғалин, реж. Д.Нургалин) тигән рухлы, илһамлы драманы күрһәтте. Батырлыҡ, традициялар, рухи көс хаҡындағы был спектакль тамашасыларҙа ҙур тәьҫорат ҡалдырҙы.