Белем биреү программаһы сиктәрендә оҫталыҡ дәрестәре ҡыҙыу рәүештә дауам итте. Б. Йосопова исемендәге Актёрҙар йортоноң бәләкәй залында драматургтар өсөн “Сценарий бүлмәһе” тип аталған махсус курс башланып китте. Был курсты Рәсәй яҙыусыһы, драматург һәм сценарист Родион Белецкий алып бара. Яңы идеялар, һөнәри тәжрибә уртаҡлашыу һәм заманса драматургиялағы тенденциялар тураһында фекер алышыуға арналған креатив майҙансыҡ. Шул уҡ ваҡытта Актёрҙар йортоноң тамаша залында “Сәхнә теле буйынса лаборатория” оҫталыҡ дәресе үтте. Кошмин Дмитрий Владимирович үткәргән был дәрестәрҙә ҡатнашыусылар сәхнә теле, тауыш менән эшләү, һүҙ әйтеү техникаһы буйынса күнекмәләрен камиллаштыра. Был иһә бигерәк тә йәш актёрҙар һәм режиссёрҙар өсөн бик ҙур ҡиммәткә эйә.

Көндөң тағы бер сағыу ваҡиғаһы булып Мәскәү Губерна театрының һатыу һәм тамашасылар менән эшләү бүлеге етәксеһе Татьяна Евгеньевна Гафарованың “Театрҙа кайдзен” оҫталыҡ дәресе үтте. Башҡорт академия драма театрының бәләкәй залында ҡатнашыусылар даими камиллашыу концепцияһы һәм театрҙарҙы үҫтереүҙең заманса алымдары менән танышты.

Кискеһен фестивалдең тамаша программаһы ике сәхнәлә бер юлы спектаклдәр менән дауам итте. Өфө “Нур” дәүләт татар театрында “Тау” спектакле (И. Юзеев, реж. А. Заббаров) күрһәтелде. Был кешенең үҙ юлын һайлауындағы һәм яҙмыштарындағы тәрән драма. Мәжит Ғафури исемендәге Башҡорт академия драма театры сәхнәһендә СГТКО составындағы И. Йомағолов исемендәге Башҡорт драма театры коллективы “Өлкән улым” спектаклен (А. Вампилов, реж. И. Казакбаев) тамашасыларға тәҡдим итте.

Фестивалдең яҡты мәлдәре дауам итә — беҙҙе алда тағы ла яңы ваҡиғалар һәм ижади асыштар көтә!