“Алтын битлек” Рәсәй милли театр премияһының 2024-2025 йылдар лонг-лисы иғлан ителде.

“Алтын битлек”тең лонг-лисы – ул театр миҙгеленең иң яҡшы премьера спектаклдәре исемлеге. Быйыл был бәйгелә ҡатнашыу өсөн Рәсәйҙең 83 төбәгенән 789 заявка килеп, мәртәбәле премия тарихында рекорд ҡуйыла, йәғни, хеҙмәттәрен театр белгестәре фекере менән ҡеүәтләргә теләгән ижадсылар һаны арта бара.

Иң һөйөндөргәне: Мәжит Ғафури исемендәге Башҡорт академия драма театрының “Яратам, тип әйтеп өлгөрмәнем” кинодрамаһы “Алтын битлек” премияның лонг-лисына индерелеп, Рәсәйҙең 2024-2025 миҙгелендәге иғтибарға лайыҡ, сағыу спектаклдәренең береһе, тип танылды.

Лонг-лисҡа тотош ил буйынса 62 постановка индерелеп, улар араһында Башдрамтеатрҙың булыуы – ҡыуаныс!