28 февраль Мәжит Ғафури исемендәге Башҡорт дәүләт академия драма театры актерҙары Хөрмәтулла Үтәшев, Морат Рафиҡов, Алмаз Йосопов һәм Өфө сәнғәт институты доценты Сәләмәтова Гөлсәсәк Дәүләтбай ҡыҙы менән берлектә Заһир Исмәғилев исемендәге Өфө дәүләт сәнғәт институтының театр факультетына М. Ғафури исем. Башҡорт академия драма театры өсөн махсус курс йыйыу һәм имтихандар тураһында мәғлүмәт еткереү өсөн Фатима Мостафина исемендәге 20-се Өфө ҡала башҡорт гимназияһы һәм Рәми Ғарипов исемендәге 1-се Башҡорт республика гимназия-интернаты уҡыусылары менән осрашыу үткәрҙе. Имтихандарға нисек әҙерләнергә, ниндәй талаптарҙы мотлаҡ үтәргә кәрәклеге хаҡында сығыш яһанылар.

Курстың художество етәксеһе – Айрат Әхтәм улы Абушахманов.
Ҡабул итеү имтихандары 2024 йылдың июль айында башлана һәм ул бер – нисә турҙан торасаҡ.
Беренсе тур: шиғыр, проза һәм мәҫәл уҡып күрһәтеү.
Икенсе тур : этюд күрһәтеү.
Өсөнсө тур : әңгәмәләшеү.
Бынан тыш, һинең ҡабул итеү комиссияһына йыр – моңға һәм бейеү сәнғәтенә булған һәләтеңде күрһәтеү мөмкинселеге лә бар.
11- се класты тамамлаған йәки махсус урта белеме булған ҡыҙ һәм егеттәрҙе мауыҡтырғыс уҡыу йортона – сәнғәт институтына саҡырабыҙ!
11 – се кластар өсөн рус теле ( кәмендә 40 балл) һәм рус әҙәбиәтенән ( кәмендә 40 балл) булған Берҙәм дәүләт имтихандарының һөҙөмтәләре кәрәк.

Март аҙағында имтахандарға әҙерлек буйынса концультациялар башланасаҡ.