Ғаилә менән ҡарау өсөн тәғәйенләнгән «Заятүләк менән Һыуһылыу» спектаклендә легендар батыр Заятүләк менән Асылыкүл хакимының ҡыҙы Һыуһылыуҙың мөхәббәте хаҡында бәйән ителә. Боронғо эпостарҙағы кеүек, хәл-ваҡиғалар ерҙә генә түгел, тылсымлы һыу аҫты донъяһында ла бара. Спектакль эпик-әкиәти юҫыҡта ҡоролған.

Ике батшалыҡ араһында оҙаҡ йылдар дауам иткән дошманлыҡ яңы йүнәлеш ала – яҡындарының үлеме өсөн үс алырға теләп, һәр батшалыҡ һөжүмгә әҙерләнә.

Был хәрби пландарға Заятүләк менән Һыуһылыу араһында ҡапыл ғына тоҡанған мөхәббәт кенә ҡаршы тора ала. Ер һәм Асылыкүл батшалыҡтарында йәшәүселәр араһындағы һуғыштар ҙа, яҡын кешенең хыянаты ла, һыу аҫты донъяһының мәкерле халҡы ла – бер ниндәй ҙә һынауҙар ғашиҡтарға ҡамасаулай алмай… Сөнки мөхәббәт барыһын да еңә!

Сағыу костюмдар, йыр-бейеүҙәр, яҡтылыҡ һәм киң форматлы видеопроекция төрлө йәштәге тамашасыларға башҡорт эпосының серле донъяһына тулыһынса сумырға мөмкинлек бирәсәк.

Мәжит Ғафури повесы буйынса «Заятүләк менән Һыуһылыу»