Мәжит Ғафури исемендәге Башҡорт академия драма театры күренекле режиссёр, Рәсәйҙең һәм Башҡортостандың атҡаҙанған сәнғәт эшмәкәре Рифҡәт Вәкил улы Исрафиловты оло юбилейы менән ихлас күңелдән ҡотлай!
Рифҡәт Вәкил улының ижад юлы Башдрамтеатр тарихының айырылғыһыҙ бер өлөшө булып тора. Оҙаҡ йылдар дауамында театрыбыҙҙың баш режиссёры һәм художество етәксеһе вазифаларында эшләп, ул башҡорт театр сәнғәтен яңы ижади бейеклектәргә күтәрҙе, милли сәхнә сәнғәтенең үҫешенә тос өлөш индерҙе.
Рифҡәт Исрафилов ҡуйған «Ғәлиәбаныу», «Оҙон-оҙаҡ бала саҡ», «Бибинур, эх, Бибинур!», «Ун өсөнсө председатель», «Ташлама утты, Прометей!» һәм башҡа бик күп спектаклдәр Башдрамтеатрҙың һәм башҡорт профессиональ театрының алтын фондына инде. Был постановкалар милли драматургияның мөмкинлектәрен киңәйтеп кенә ҡалманы, ә башҡорт режиссураһы һәм актёрлыҡ сәнғәте үҫешендә тотош бер ижади осорҙо билдәләне.
Рифҡәт Вәкил улы етәкселегендә башҡорт сәхнәһенең бер нисә быуын күренекле оҫталары ижад итте. Уның режиссёрлыҡ мәктәбен үткән Фидан Ғафаров, Нурия Ирсаева, Эльвира Юнысова, Илдар Сәйетов һәм башҡа бик күп артистар театр донъяһында сағыу йондоҙҙар булып балҡыны. Режиссёр менән берлектә эшләгән рәссамдар, композиторҙар һәм театр сәнғәтенең башҡа вәкилдәре лә юғары ижади үрҙәргә күтәрелде.
Рифҡәт Исрафилов Башдрамтеатрҙа эшләгән осорҙа театр республиканың мәҙәни тормошонда ғына түгел, ә Рәсәй театр киңлегендә лә мөһим сәнғәт үҙәктәренең береһе булараҡ абруйын нығытты. Киң күләмле гастролдәр ойошторолдо, Рәсәйҙең һәм башҡа төбәктәрҙең театр коллективтары менән ижади бәйләнештәр киңәйҙе. Рифҡәт Вәкил улының ойоштороу һәләте һәм театр сәнғәтен халыҡ-ара кимәлдә үҫтереүгә ынтылышы һөҙөмтәһендә «Туғанлыҡ» халыҡ-ара төрки телле театрҙар фестиваленә нигеҙ һалынды. Бөгөн был фестиваль төрлө халыҡтарҙың театр сәнғәтен берләштергән, мәҙәни һәм ижади бәйләнештәрҙе нығытҡан әһәмиәтле майҙансыҡ булып тора.
Бөгөн дә Рифҡәт Вәкил улы М. Горький исемендәге Ырымбур өлкә драма театрының художество етәксеһе булараҡ Театр ғәли йәнәптәренә тоғро хеҙмәт итә, яңы спектаклдәр ҡуя һәм Рәсәйҙең билдәле режиссёр-ҡуйыусыларының береһе булып ҡала.
Уның бай ижади һәм тормош тәжрибәһе, режиссёр булараҡ юғары абруйы, үҙенсәлекле мәктәбе тирәһенә фекерҙәштәрен һәм уҡыусыларын туплай. Ә һәр яңы спектакле тамашасылар өсөн көтөп алынған мәҙәни ваҡиғаға әүерелә.
Хөрмәтле Рифҡәт Вәкил улы!
Һеҙҙең Мәжит Ғафури исемендәге Башҡорт академия драма театры һәм тотош милли театр сәнғәте үҫешенә индергән өлөшөгөҙ баһалап бөткөһөҙ. Һеҙ ҡуйған спектаклдәр, тәрбиәләгән артистар, булдырған ижади традициялар бөгөн дә театрыбыҙ тарихының ҡиммәтле бер өлөшө булып йәшәй.
Һеҙгә ныҡлы һаулыҡ, бөтмәҫ ижади дәрт һәм көс-ҡеүәт, оҙон ғүмер, яңы сағыу спектаклдәр, уңышлы ижади проекттар һәм һәр ваҡыт алҡыштарға күмгән рәхмәтле тамашасылар теләйбеҙ! Артабан да ижадығыҙ менән театр донъяһын һәм замандаштарыбыҙҙы оҙаҡ йылдар һөйөндөрөргә яҙһын!
Оло ихтирам менән,
Мәжит Ғафури исемендәге Башҡорт академия драма театры коллективы