19 ноябрҙә Мәжит Ғафури исемендәге Башҡорт академия драма театрының Ҡазан ҡалаһындағы гастролдәре тамамланды.
Гөрләп уҙҙы гастролдәр! Һәр кис тулы залдар менән ҡаршы алды актерҙарҙы тамашасылар һәм спектакль тамамланғас, ҡайнар алҡыштар менән оҙатты.
Коллектив алты көн эсендә Г.Камал исемендәге Татар дәүләт академия театры сәхнәһендә сәхнәһендә – ун бер спектакль, шулай уҡ мәғариф ойошмаларында 3 спектакль уйнаны, “Залесный” мәҙәниәт үҙәгендә осрашыуҙа ҡатнашты.
Гастролдәр Айрат Абушахмановтың “Ҡоҙаса” (Б.Бикбай, З.Исмәғилев) музыкаль комедияһы менән ябылды. Татарстан Республикаһы мәҙәниәт министры урынбаҫары Дамир Натфуллин, коллективты уңышлы гастролдәр менән тәбрикләп, мәҙәниәт үҫешенә өлөш индергәндәре өсөн бер төркөм ижадсыларға хөкүмәт наградаларын тапшырҙы. Рәсәйҙең атҡаҙанған, Башҡортостандың халыҡ артисы Эльвира Юнысова – “Мәҙәниәттәге ҡаҙаныштары өсөн” Почет билдәһе; театрҙың баш режиссеры, Башҡортостандың атҡаҙанған сәнғәт эшмәкәре Айрат Абушахманов, Башҡортостандың халыҡ артисы Гүзәл Маликова, Башҡортостандың атҡаҙанған артистары Римма Ҡаһарманова, Фәнис Рәхмәтов, актриса Лилиә Ғәлина һәм Зилиә Ситдиҡова – Татарстан Республикаһы Мәҙәниәт министрлығының Маҡтау Грамоталары менән, актерҙар Юнир Ҡоланбаев, Айнур Ситдиҡов, тамашасылар менән эшләү һәм гастролдәр ойоштороу бүлеге етәксеһе Лилиә Жамалова Татарстан Республикаһы мәҙәниәт министрлығының Рәхмәт хаттары менән бүләкләнделәр.

Яҡты йөҙөгөҙ, ҡунаҡсыллығығыҙ өсөн рәхмәт һеҙгә, камалдар!
Яңынан осрашҡанға тиклем, Ҡазан тамашасылары!

Фото Р.Яҡупова