Мәжит Ғафури әҫәре буйынса Айрат Абушахманов, Шәүрә Ғилманова инсценировкаһына ярашлы ҡуйылған “Ҡара йөҙҙәр” спектакле Башҡортостандың төп театры репертуарында тиҫтә йылдан ашыу лайыҡлы урын биләй. Халыҡ-ара фестивалдәрҙә ҡатнашып, “Алтын битлек” премияһы номинанты булып, Будапешт ҡалаһында үткән MITEM фестивалендә булып, был спектакль башҡорт театр сәнғәтен донъя кимәлендә танытып йәшәй.

2025 йылдың 10-16 ноябрендә М. Ғафури исемендәге Башҡорт академия драма театры Ҡазан ҡалаһындағы Ҙур гастролдәре сиктәрендә Ғ. Камал исемендәге Татар академия театрының яңы бинаһында “Ҡара йөҙҙәр” спектаклен тәҡдим итте. Был постановканың төп үҙенсәлеге – тамашасының сәхнә яҡлап ултырып, хәл-ваҡиғаларҙың зал фонында, халыҡҡа ҡул биремендәй яҡынлыҡта барыуы.

Трагедия үҙәгендә − кеше тәбиғәте. Дин-шәриғәт ҡанундарына һылтанып, наҙан халыҡтың ике йәш кешене һәләк итеүе. Был драманан да ҡыҙғанысыраҡ спектакль юҡтыр..